7 ліпеня на месцы былой сядзібы Жорнаўка ў в. Дубрава Асіповіцкага р-на чарговы раз прайшло штогадовае свята, прысвечанае Магдалене Радзівіл – буйной дзяячцы і мецэнатцы беларускага руху пачатку ХХ ст.
Свята ладзілася намаганнямі Музея гісторыі беларускай літаратуры, Асіповіцкага раённага гісторыка-краязнаўчага музея, Лапіцкага с/савета, Асіповіцкага аддзела культуры, сям'і Хурсікаў ды іншых беларускіх патрыётаў.
Музей гісторыі беларускай літаратуры зладзіў выставу «Мы ёсць народам!» да 100 годдзя Беларускай Народнай Рэспублікі.
Адбылася прэзентацыя кніжкі Віктара Хурсіка «Vale! Кніга пра род і лёс Магдалены Радзівіл!».
Віктар Хурсік: «З палякамі ў Магдалены Радзівіл не склалася. Яе пазіцыя цвёрдай і паслядоўнай беларусізацыі ўспрымалася шляхтай адмоўна. Беларускамоўныя школкі, беларускамоўны касцёл, беларускамоўная прэса – гэта было за межамі рэчаіснасці, якая год за годам усё больш паказвала на выхад палякаў са складу Расіі. Польскамоўным беларускім сялянам-аднадворцам мроіўся рай у складзе вольнай Польшчы. У гэтых умовах прызнанне княгіні ў сваёй беларускасці і жаданне «абеларусіць» іншых гучала выклікам. Газеты бэсцілі Магдалену, у 1919 годзе палякі адкрыта папярэдзілі аб магчымых небяспечных для яе наступствах. Неўзабаве княгіня была моцна збіта і, асцерагаючыся за сваё жыццё, выехала з Варшавы ў Кёнігсберг. За 26 апошніх гадоў яна больш ніколі не вярталася ў Польшчу...».
Свята атрымалася сапраўды беларускім і народным – некалькі соцень мясцовых і прыезджых дабраліся ў в.Жорнаўку, каб добрым словам, спевамі, вершамі засведчыць сваю павагу памяці нашай годнай зямлячцы.
